diocesedemahaginioka

 SALA PI ORO DAK ACEL MI POKO LEMB KWENDA I EKLEZIA MI

 MAHAGI-NIOKA 

1912-2012

Mungu ma Wegwa, pi maru peri ma kajik ne mbe, ioro Wodi Yezu pi laruwa man pi ketho wadok nyithindo peri. Ku kony pa Cwiny Maleng’, wadoko nyithindo peri andha, udoko oro dak acel eni.

Niay ma Sacramenta mi kwong’o umiyire i ng’om thuwa i oro eluf’acel dak abungwen kud apar aryo, wan, nyithindo peri macoo ku manyir mi Diocèse mi Mahagi-Nioka, wabekweyi ku ng’wono:

Wabefoyi pilembe ioro iwa jukwenda mi Lemb’Anyong’a mi both ku kony pa Megwa Dhaker mir Afrika. Ku tic ma jukwenda eno gitimo, i kind oro dak’acel, piri dhanu dupa uloko cwinygi ba Wodi.

I kind dhanu m’uloko cwinygi eno ing’iyo jumoko ni juaskofu, jupadri, jumama, jufrera, ju m’uthyero kwo migi zo pi poko Enjili, ni juponji mi dini, man jukristu m’umiyiri i tic matung’ tung’ mi mewo Enjili, ceke pi woro macikira mi batizo migi man lwong’o migi. Pi bero maeno ceke wabedwoko iri foyo-foc mwa.

Wabefoyi pi loko cwinywa m’iloko, pi kura mwa man pi kwo mwa m’iloko i lero mir Enjili. Pok mugisa iwi jukwenda m’ukelo iwa Enjili ne: ku jukristu m’umaku cing’gi.

Jol i lero peri juwagi ceke m’utelo iwa yo i kwo makutum, jumange ceke ma juoyo rimbgi ku kero  i Aba, i Mahagi man i Biringi.

Konywa watim  mutoro mi oro dak acel eni ku woro m’andha, lok weng’i inen tic ma ju mi kwong’o caku i ng’om thuwa, ku ma wan de wabetimo tego nimedo toke.

Pi lembe ceke m’ucerowa nimiyira, pi wil-wic mwa, pi rac mwa m’ucero dongo mi Ker pa Mungu, man m’utwilo Eklezia ma tye wat pa Mungu i Diocèse mwa, Rwoth, be iwa ku kisa!

Pi koro wat m’areri, pi cwiny mir akoyakoya makeca, pi  paru pijo gijo akeca, pi paru rac i wi jumange, pir adegi, Rwoth, be iwa ku kisa!

Rwoth, keth thum mi oro dak acel eni m’ubeyabu dhu oro mange dak acel ma wabecicaku ukonywa pi maku tego manyen kara, ku tic mwa m’udaru nikadhu, wacor i wang’wa i lero ma terere.

Keth wagyer wat pa Mungu ma tye acel, m’ung’eyo jol, ma dhanu mi iye copo nirombo i kindgi, nimariri, man nidiko cing’gi pi dongo karacelo.

Keth ku tego mir Enjili m’unyay’i kura mwa, man kura mwa m’ujolo Enjili, wabe, ku bang’ suru mwa ceke acel acel, ni jukristu mir Afrika m’andha man ni nyithindo mir Afrika ma tye jukristu m’andha.

Keth Enjili m’uguro lake eno ulok kwo mwa zo, kara kodhi mi Ker pa Mungu unen i kwo mwa makawoni i kura lembe ceke.

Wakwayu kony peri, e Rwoth, kara ni kum lembe maeno ceke unen i n’gom thuwa niya Eklezia tye acel, maleng’, katholika man m’uay i bang’ Jukwenda.

Bikira Maria Makeng’, Dhaker mir Afrika, kway iwa!

Jumaleng’ m’utho pi dhini i Uganda, wukway iwa!

Josephine Bakhita Maleng’, kway iwa!

Jamugisa Marie-Clémentine Anuarite, kway iwa!

Jamugisa Isidore Bakanja, kway iwa!

Jamugisa Francisko Spoto, kway iwa!

Wu jumaleng’ ceke mi polo, wukway iwa!

« Repartons du Christ,

Unique  Sauveur »